大家好 我係綺琪 可以叫我yuki 首先多謝可榮牧師比我係lee度跟大家分享我見證 我信咗主十幾年 係因為我好朋友阿仔 介紹天父比我認識 十幾年前 佢同我講 佢信咗主 講咗幾個見證我聽 我話有冇咁神奇呀 佢話不如你都試下祈禱啦 無野架 當同朋友傾計 咁我又試吓啦 起初我連祈禱都唔識 真係當傾心事一樣 傾完就阿們 一傾就傾咗十幾年 十幾年來天父比我好多回應 多到三日三夜都講唔完 點解今日決定洗禮呢 其實我黎咗恩光堂只有三個月 係對面飲茶等位見到 有間教會 神召會 好似幾好播 十點半開始崇拜 好播 唔洗咁早起身 第二日 九點醒咗 不如去教會 阿女話 都好 咁我自己就膽粗粗行咗入黎喇 恩光堂比我感覺好自在 唔驅速 點解突然決定洗禮呢 其實因為我阿媽 佢要做手術 我地聽到晴天霹靂 唔知點決定 番到屋企 我喊啦 我老公同我講 無事既 唔好喊 驚就祈禱 嘩 好神奇 我老公唔係一個基督徒 都咁講 我好感動 個晚我成晚都訓唔著 第二朝就喊醒了 突然之間 好實在聽到一把聲 「有回應喇」我九秒九彈起身 拎起個電話睇 原來我家姐留言 佢昨晚係街見到個姐妹 同佢講 佢媽當年都做過同樣既手術 解釋比我地知 做這個手術係正確 嘩 我聽完即刻淚流滿臉 我覺得好神奇 真係有回應 神用我身邊既人給我回應 本來聽完咁講 都打了枝強心針 決定做手術 後來聽到醫生講危險性 我地又驚起來 都係唔做住 出院先算 我又問家姐 唔做手術會否對神無信心呢？我家姐又去問佢姐妹 佢話 神唔會怪你地 神會開心見到你地幾兄姐妹有商有量 大家都愛錫媽媽 為媽媽做最好既決定 總有一天 神會讓你們共識為媽媽作最好既醫治
之後 我地同阿媽睇咗幾個醫生 都見議要做手術 最後 大家真係共識 決定做手術
做完手術 阿媽同我講 好痛 當時我個心好痛 不停祈禱 希望阿媽唔好痛 希望佢傷口快快埋口 搵晒我身邊所有朋友幫手祈禱 手術第二日 姑娘話醫生手勢好好 傷口都埋得好靚 阿媽話 今日無咁痛 咁大截肢手術 阿媽第三日已經可以出院 好感恩 阿媽今次手術 前後決定只有兩星期 但我大大感受到主與我同行 讓我感受到佢對我既厚愛 今日洗禮都係我同主既承諾 我阿媽平安無事 我就洗禮 今日阿媽好好 無再痛喇 佢都有黎睇我洗禮 係 lee 度我要多謝恩光堂弟兄姊妹不停為我媽代禱
如果大家仲未信主 今晚大家都試下同天父傾計 親身感受一下 天父給你們平安 給你們回應 感謝主 多謝大家